بصراحة ... انا مكنش نفسى غير فى حاجة واحدة بس
وهى انى ادخل اى مجال فيه تعامل مع الحيوانات
وده لانى بحبهم جدا جدا جدا لدرجة معتقدش حد ممكن يتخيلها الا اللى بيحب الحيوانات زيى كده
بس للاسف بقى دراستى كلها كانت فى الازهر ومافيهوش كلية طب بيطرى بنات 
وشوفوا حتى حظى وصل لدرجة ايه كمان الجامعات الخاصة والكليات مافيهاش التخصص ده بالذات لانه محدش بيطلبه 
يآآه يااخ شادى فكرتنى باللى فات وانقضى ..ليه بس بتقلب عليا المواجع 
ومع ذلك انا لما دخلت الكلية اللى انا فيها ( دراسات اسلامية قسم شريعة) دخلتها عن اقتناع تام 
وباحمد ربنا كتير انه وفقنى للاختيار ده ومقتنعة جدا والحمد لله بانه اكيد لو كان الطب البيطرى فيه خير ليا مكنتش اتحرمت منه بالشكل ده
برغم حبى الشديد له ورغبتى الكبيرة فيه
لكن سبحان الله اعتقد انى لو كنت دخلته كانت حياتى اختلفت تماما
ومفتكرش ابدا كنت هابقى راضية عن الاختلاف ده
مجال دراستى فى الشريعة خلانى اتعلم حاجات كتير فى الدين كان من المستحيل انى اعرفها لوحدى لو كنت عملت ايه وده كله بتوفيق من الله سبحانه وتعالى
انا مؤمنة من جوايا والحمد لله انى قدرت اوصل لبداية الطريق اللى هيوصلنى لحلمى ان شاء الله
اكيد مستغربين وبتقولو وايه علاقة الشريعة بالطب البيطرى؟!
انا عارفه انى قلت فى الاول انه ده كان حلمى بس تصدقوا ياجماعة انى لما دخلت الكلية اكتشفت انها هى كانت حلمى اللى كنت باتمناه
بس كان مستخبى جوايا ومكنتش واخدة بالى منه لحد ماتحقق
فسبحان الله ساعات ياجماعة الواحد طول عمره بيفضل يحلم بشىء معين وبيتمنى انه يحققه واوقات كتيرة ربنا بيوفقه و بيوصل للحلم ده بس للاسف مش بيشعر معاه بالراحة النفسية ولا السعادة اللى كان بيحلم بيها وقتها
وساعات تانية لما بيسيب نفسه للقدر ومبيعندش معاه بالفعل بيلاقى الراحة دى وبيتأكد انه لقى الحلم اللى بيدور عليه
انا نفسى وبجد وبعون الله انى اجتهد فى مجال دراستى ومتكونش الدراسة لمجرد الامتحان والنجاح والتقدير ..لا بالعكس اتمنى انى استفيد بالدراسة دى فى حياتى وافيد غيرى كتير .. والله المستعان
بس الخطوة دى صعبة اوى ياجماعة مش سهلة ابداً محتاجة لصبر وارادة قوية جدا والنفس البشرية بقى انتم عارفين مجننانى
ربنا يستر 
واقدر عليها بإذن الله وكمان المجتمع اللى عايشين فيه عليه عامل كبير جدا فى التشجيع او فى الاحباط 
وحاليا كل اللى باعمله - ومافيش فى ايدى غيره - عشان اوصل لكده
انى اتابع الدراسة فى الكلية كويس جدا وكمان احاول اقرأ مش بس فى كتب الكلية ده كمان فى اى كتاب يمر عليا احس انى اقدر استفيد منه
تصدقوا كنت هانسى اهم حلم بجد كنت باحلم بيه طول عمرى والايام دى زاد اشتياقى انى احققه فى اقرب وقت ..
نفسى نفسى نفسى وباتمنى وبشدة انى اقدر اختم حفظى لكتاب الله الكريم
ومش بس حفظ عادى ده بالتجويد والقراءة السليمة كمان ( اللهم اعنى على حفظ كتابك الكريم على اكمل وجه يارب العالمين) وان شاء الله اقدر احقق الحلم ده كمان
لانى والحمد لله بالفعل حفظه جزء كبير من القرآن وسبق وكنت حفظاه كله فى المدرسة
بس مشكلة القرآن انه بيتفلت بسهولة جدا لو مارجعناش عليه،
وسبق وقلتلكم بقى على النفس البشرية دى
ربنا يقوينا عليها ويعينّا ونقدر نروضها على عمل الطاعات والاستمرار فيها اهو ده بقى كل اللى جه على بالى دلوقتى من اللى كان نفسى فيه وباتمنى احققه
ومش عايزة اطول عليكم اكتر من كده بقى عشان الملل والزهق اللى ممكن اسببهم لكم
الله يكون فى عونكم مش عارفه انتم استحملتم تقرأوا ده كله ازاى ياعينى على الصبر اللى انتم فيه
واحب فى النهاية انى اشكرك كتير يااخ شادى على فكرة الموضوع الجميل ده
وبادعى للاخت حبيبة انه ربنا يوفقها ويعينها على اللى هى فيه
وياريت كلنا ندعيلها من قلبنا
لانه بجد مش سهل ابداااااااااااااا
موضوع: يا ترى كان نفسك تطلع إيه !! 
الإثنين 30 أكتوبر 2006, 14:21
مين فينا حقق حلموا ؟
